بحبك يا مصر

بحبك يا مصر
بحبك يامصر لانك بلادي.... لانك يامصر اهلي و ناسي
لانك مكاني لانك زماني...وحبك يامصر ده شيء اساسي


بحبك يامصر برغم الظروف...و هاوصف يامصر و مش طالبة خوف
و ايه يعني لو حتى قالوا و لموني...ده اسمك يامصر محفور ع الكفوف


بحبك يا مصر و هقولها و هاعيد...و ان شاالله يامصر يخدوني لبعيد
و انساكي يا مصر ده مستحيل...لانك يا مصر حبك شديد


بحبك يا مصر و انت الوطن...و رغم البلاوي و رغم المحن
و حبك يا مصر ده حاجة سهلة...لانك يا مصر انت السكن





بحبك يا مصر لاني لقيتك...في القرأن يا مصر لقيتك باسمك
و لما قريت الانجيل وجدتك...مش هوه ده بردو يا مصر وصفك؟


بحبك يا مصر و كان فيكي المسيح...و كان فيكي يامصر موسى الكليم
و انت يا مصر عاش فيكي الخليل...و عاش فيكي يوسف بقلبه السليم


بحبك يا مصر و ف قلبي الم...و هكتب و قول و ادي القلم
ده همك يا مصر هو بردو همي...و هفضل اشيله و من غير ندم


بحبك يا مصر و لكن لامتى؟...لامتى يا مصر؟ لامتى؟ لامتى؟
جميلك على راسي يا مصر حسه ... و اوعى يا مصر تفتكري اني هنسى


بحبك يا مصر و لازم نقوم... لانك يا مصر فيكي هموم
و لكنك يا مصر قد الصعاب...ولكن بردو لازم نقوم


بحبك يا مصر و ادي شبابك... واقفين يا مصر حراس لبابك
و هم اللي يوم هيلبوا الندا...و هم اللي يوم هيضحوا عشانك





وتهت يا مصر عنك كتير... لقيتك يا مصر منادية عليه
عرفتك بهرمك عرفتك باهلك ... عرفتك يا مصر بخيرك عليه
و لكن يا مصر انت قوليلي ... و دليني يا مصر انت الدليل
عشان اعرف ارد الجميل ... واشيل يا مصر حملك تقيل
عيزاني يا مصر جندي في جيشك؟ ... عيزاني يا مصر فلاح في غيطك؟
عيزاني صانع؟ عيزاني عامل؟ ... عيزاني يا مصر خدام اجيلك


بحبك يا مصر و ادي الحكاية ... و لو عايزة اقولها كمان من البداية
انا يا مصر رهن لاشارتك...لانك يا مصر غالية عليه


بحبك يا مصر لانك عزيزة ... و حبك يا مصر ف قلبي غريزة
و عمري ما لقيت غيرك انيسة... لقيت فيكي جامع و فيكي كنيسة


بحبك يا مصر لانك انت امي ... و امي يا مصر هي بردو امي
لكنك يا مصر بردو ام امي ... يبقى يا مصر انت تبقي امي


بحبك يا مصر و احميكي بعينَـيَّه... لانك اغلى من عيني شوية
لا يا مصر انت اغلى كتير ... هو انت عمرك بخلتي عليه؟


بحبك يا مصر و سماكي سمايا ... و ارضك هيه اللي بتعلم خطايا
و ف حضنك انا حسيت بالامان ... و سعادتي يا مصر طول ما انت معايا




بحبك يا مصر و نفسي يسمعوها ... و في غيري كتير كمان بيقولوها
بس يا مصر صوتنا ليه ضعيف؟ ... يمكن لان في منا بعوها


بحبك يامصر و قدمنا كتير ... لان الحلم في عنينا كبير
و الحلم لازم في يوم يبقى حقيقة ... يا مصر حلمنا شئ مش عسير


بحبك يا مصر و رجّالتك شداد ... و ستاتك كمان ف عنيهم عناد
حلفين يرفعوا اسمك تمللي ... ده شعبك يا مصر معروف في البلاد


بحبك يامصر لانك امنا ... ده انت يا مصر شيء بيلمنا
و حبك هوّا اللي بيدينا الامل ... لانك يا مصر حته مننا

اللهم انصر الحق و اعز مصر و المصريين